TACLOBAN CITY – Naobserbahan han Department of Trade and Industry Eastern Visayas an pag-umento han presyo han mga pangunahon nga papliton ha kaluyo han pagpapatuman han price freeze mahuman igdeklara ni Presidente Ferdinand R. Marcos Jr. an State of Calamity ha bug-os nga rehiyon.
Subay kan Department of Trade and Industry Eastern Visayas Information Officer, Anthea Aivi Borbon-Ancheta, gin-call out na han ira ahensiya an pira nga mga establisyemento agud mag-eksplikar han rason han pag-umento han presyo han pipira nga mga produkto.
Gintudlok naman han mga lokal nga distributor ngan retailer an hitaas nga gastos han transportation ngan logistics kumo rason kasumpay han paglilimita han San Juanico Bridge.
Mahitungod hini in napipiritan hira mag-transload, trans-dock, o cross-dock hin mga produkto nga nagpapahitaas naman hiton gastos.
Samtang padayon iton krisis nga ginkaka-atubang han mga konsyumer ngan negosyante in nagbibinurubligay naman an mga ahensiya han gobyerno agud makontrol an implasyon ha mga masunod nga bulan.
Padayon naman iton panawagan han DTI ha publiko nga ig-report an mga establisyemento nga dire nasunod han iginpapatuman nga price freeze ngan nasukot hin mas sobra pa ha itinakda nga presyo. (via Bombo Shiela Encio)
