TACLOBAN CITY – Utro nga nagpahimatngun an Bureau of Fire Protection ha publiko ha sunog kasumpay na gihapon ha nahipatik han buhatan nga sagunson nga insidente hini.
Ini nga utro nga pahimatngun nira in kaupod ha mas ginpahugot pa hini nga kampanya kontra sunog, kun diin basar han ira pinaka-urhi nga datos maabot na milyones iton danyos mahitungod hini nga insidente ha bug-os nga rehiyon.
Sumala kan BFP Tacloban Fire and Arson Investigation & Intelligence Section Acting Chief, SFO1 Jonald V. Lace, nga importante nga mahibaruan han publiko an paghirot ngan paglikay hiton sunog.
Usa mangud ha mga rason han sunog in an napapabay-an nga mga lampara o kandila ha mga panimalay, overload nga saksakan, mga sayop nga kataod hiton suplay han kuryente, upos nga sigarilyo ngan katol, mga hinungdan han sunog nga nahipapatik ha mga kabablayan.
Dugang pa hini nga dako nga porsyento han mga naapektaran han sunog in mga residential houses ngan ini in tungod la ha simple nga pagigin pabaya ha mga posible magin kawsa han sunog.
Kasumpay naman hini, mahugot naman iton ira gindudumara nga fire prevention campaign ngan sugad man training ha mga iskuylahan ngan barangay, agud mas mapakusog pa iton kaadman han publiko kun mag-aano in kaso mayda sunog ha ira lugar.
Samtang, nagpahimatngun gihapon an BFP nga dayon tumawag ha 911 hotline o an mga numero nga nakabutang ha ira Facebook page kun may-ada sunog, likayi an pag-video anay agud nga maka-responde dayon an mga bumbero ha area ngan tagan hin prayoridad ha dalan kun mayda BFP Truck nga may emergency.
