ODD — Usa nga turista la ngayan an makakakuha ha sakto nga kombinasyon han usa nga safe o kaha de yero nga 40 ka tuig na nga nakasara ngan diri naaabrehan han hino man.
Nahimo ini ni Stephen Mills han bisitahon niya ngan han iya pamilya an Vermilion Heritage Museum ha Alberta, Canada kun diin matatad-an an usa nga cafe nga dati nga ada ha Brunswick Hotel nga nagsara dida pa han 1970s.
Sugad han iba nga bisita han museum, gintagan hi Mills hin higayon nga tigo-on an kombinasyon han safe, nga diri maabrehan bisan pa han mga eksperto ha mga kaha de yero.
Ha syahan nga pagprobar pala, naabrehan dayon ini ni Mills, nga waray bisan anu nga experience ha pag aabre hin mga safe.
Ginprobaran la daw niya an mga syahan nga numero ha iya huna huna nga 20-40-60.
Diri naman hiya makatood han tigda nala nga umabre an safe o kaha de yero.
Ha luyo naman han napakamaiha na nga panahon nga ginhulat ugsa ini nga maabrehan, waray naman importante nga butang nga nakatagi ha kaha de yero. Puro la mga kadaan nga tseke, notebook ngan resibo la an natad-an ha sakob hini.
