Dire maubos ha dose-dosena katawo an namatay mahuman mahitabo an usa nga pagbuto ha northern Myanmar dida han Dominggo.
Nahitabo an insidente banda alas-12 han udto ha Namhkam township.
Subay ha usa nga first responder ha Namhkan district ha Shan state, umabot ha 46 an namatay, kaupod an kabataan, samtang sobra 70 naman an nasamaran. Usa pa nga rescuer an nagpahayag nga 59 katawo an kabug-usan nga ihap han mga namatay.
Ginmalatumat naman han National Liberation Army (TNLA), usa nga kilala nga ethnic armed groups ha nasud nga an pagbuto in durot han “accident detonation” han nakatirok nga pampasabog nga ginagamit ha pagmimina ngan quarrying.
Waray pa naman sigurado nga ihap han mga biktima an ginpagawas han grupo samtang nagpapadayon an imbestigasyon ha eksakto nga rason han insidente.
Ginmalatumat gihapon han TNLA nga an mga pampasabog in panag-iya han ira economic department, ngan padayon nira nga gin aadman kun kay-ano ini bumuto.
Manunumduman nga an Myanmar in nagpapabilin nga aada ha butnga han civil war tikang han agawon han militar an kapas dida han 2021, nga nagdurot hin padayon nga kasamok ha butnga han junta forces ngan iba iba nga pro-democracy ngan ethnics armed groups.
