Nagpahayag an Free Legal Assistance Group (FLAG) hin kaandaman nga bumulig ha bag-o nga tukod nga Truth and Reconciliation Commission, usa nga independent body nga magdu-dokumento ha mga pamatay ngan karahasan nga nahitabo ha panahon nga ginlunsar ni anay Presidente Rodrigo Duterte an madugo nga kampanyang kontra ha ilegal nga droga.
Ha opisyal nga pahayag nga ginpagawas han grupo, nakasurat dinhi an ira pagsuporta ha importante nga trabaho han bag-o nga komisyon, ngan an panginahanglan agud mabalikan ngan maidokumento an mga nahitabo ha nasabi nga panahon.
Subay ha grupo nga ginbubug-os han mga batikan nga abogado, an pag-iwas han Pilipinas tikang ha Rome Statute in nagpahinay ha sakop ngan kapas han International Criminal Court ha mga sitwasyon nga nahitabo ha Pilipinas nga maikokonsidera nga ‘makarima-dima.’
Damo ha mga namatay ha urhi nga parte han Duterte administration in waray kaimbestigari mahitungod nga dire na membro an Pilipinas ha nasbai nga tribunal hadto nga panahon.
Mahitungod hini, kinahangan an usa nga Truth Commission agud panginanuon an mga nasabi nga pamatay mahitungod nga damo ha mga ini in nakalimtan na, waray ngaran, waray kai-dokumento, ngan basta nala ginpabay-an.
Kampante an FLAG nga matatagan han Truth Commission hin boses ngan espasyo an pamilya han mga biktima han madugo nga drug war—butang nga waray kahitabo ha mga nakalabay nga tuig.
Nagpahayag gihapon an grupo hin madig-on nga pagrig-on kaupod an mga survivor, pamilya han biktima, ngan mga testigos nga kutob yana in gindadara la gihapon an pagkawara han ira mga pamilya.
