Samtang ginseselebrar ni Vice President Sara Duterte an iya kaadlawon dida han Dominggo, ginmalatumat han House prosecution spokesperson nga hi Kabataan Party-list Rep. Renee Co nga an pinakaimportante nga “regalo” ha Bise Presidente in an higayon nga mabaton an mga akusasyon kontra ha iya pinaagi han due process.
Ha usa nga panayam, gintagan-duon ni Co nga an “birthday gift” han House prosecution panel in an constitutional guarantee nga matatagan hi Duterte hin sakto nga higayon agud igpahayag an iya parte ha atubangan han Senate impeachment court.
Gin aghat gihapon han magbabalaod hi VP Sara nga gamiton an impeachment trial agud direkta nga batunon an mga akusasyon nga nakasulod ha articles of impeachment, ngan iginduon nga maiha na nga ginhuhulat han publiko an iya eksplinasyon ha mga isyu nga ginbabatak kontra ha iya.
Sumala kan Co, ginmalatumat na gihapon han legal team ni Duterte nga babatunon han bise presidente an mga akusasyon ha pagdungog.
Dugang pa hini, ginlalauman han House prosecution panel an usa nga mahugot nga depensa nga dire la nakapokus ha mga istoryahon nga procedural.
Ginlalauman nga magsasalawad hi Duterte han iya baton ha Senate impeachment court yana nga adlaw, Hunyo 1, nga gintalaan nga deadline ha ilarom han rules han Senado.
Kaupod ha mga alegasyon ha impeachment complaint an sayop nga paggamit han confidential funds, dire ma-eksplikar nga karikuhan, bribery, ngan grave threats kontra ha pira nga opisyal han gobyerno.
