INTERNATIONAL – Ugsa pa man an ginaabangan nga paghampang, nagpayahag na hi US President Donald Trump han iya hingyap nga mahisgotan kaupod hi Ukrainian President Volodymyr Zelensky ngan delegasyon han European leaders.
Ha usa nga post ni Trump, ginmalatumat hini nga kinahanglan sumugot hi Zelensky ha pira nga mga kondisyon han Russia agud malikayan an giyera ha Ukraine.
An duha nga kondisyon in ginlatag ni Russian President Vladimir Putin kun diin sumala kan Trump in kinahanglan igsurender na han Ukraine an Crimea nga iligal nga nakubkub kumo annex han Russia did ahan 2014 ngan kinahanglan in sumugot hi Zelensky nga dire na makig-alyansa pa ha North Altantic Treaty Organization.
Nagpahayag naman hin pagkabaraka dinhi an European leaders nga nakatalaan gihapon nga tumambong ha White House agud umatender ha pagharampang nira Trump ngan Zelensky.
Samtang ha luyo naman hini, naglalaum an EU leaders nga makakakuha hin kadugangan nga impormasyon tikang kan Trump kun ano an posible nga i-concede han Russia kumo parte han peace deal sugadman kun ano an magigin papel han Amerika ha paghahatag han security guarantees ha hinaharap.
