Iginbalhin ha usa nga ospital ha Tehran an nakapreso nga Iranian Nobel Peace Prize winner nga hi Narges Mohammadi mahuman atakehon ha kasing-kasing duha kasemana an nakalabay.
Subay ha foundation nga ginmamanguluhan han iya pamilya, temporaryo nga ginsuspendi an iya sentensiya kabalyon hin dako nga pyansa agud matagan hira hin mas maupay nga pagtambal.
Hi Mohammadi, 54-anyos, in gintagan hin Nobel Peace Prize Award dida han 2023 samtang naka-preso mahitungod ha iya kampanyang para ha katungod han mga kababayen-an ngan pagbaribad ha death penalty ha Iran.
Tikang ha presohan han Zanjan, gindara hiya ha Tehran Pars Hospital kun diin hiya tatambalon han iya kalugaringon nga medical team
Dida han Pebrero, utro gin sirotan hi Mohammadi hin panibag-o nga pito katuig nga pagkakapreso.
Gin aresto hiya dida han Disyembre mahuman niya kondenahon an pagkamatay han abogado nga hi Khosrow Alikordi.
Bisan man kun temporaryo nga nakagawas ha presohan hi Mohammadi, ginmalatumat han iya foundation nga dire sakto an suspension han sentensiya ngan kinahanglan hin tibway pagawson mahitungod nga nagkikinanahanglan ini hin padayon nga pagtambal.
Samtang, padayon gihapon nga ginbabantayan han international rights groups an sitwasyon an sitwasyon ha Iran mahitungod ha mga report han crackdown, internet restrictions, ngan an padayon nga pagbitay ha mga dabi ha mga protesta ha nasud.
