TACLOBAN CITY – Gin-aaghat han Department of Trade and Industry (DTI) Regional Office 8 an mga konsumidor nga humabol ha nagpapadayon nga trade fair para han mga young entrepreneurs ha usa nga mall ha syudad han Tacloban.
Sumala kan Eleanor Etulle, Chief han Consumers’ Protection Division han DTI 8, nagtikang han nakalabay nga Hulyo 28 ngan maghuhuman buwas nga adlaw Hulyo 31 an Young Entrepreneurship Program (YEP) Market Expo para han mga kabataan nga negosyante o businessmen.
Tikang ha alas 10 hiton aga kutob alas 9 hiton gab-i an mao nga trade fair nga nagpapanuyo nga mapromote ngan maipakita ha publiko an mga produkto han mga young entrepreneurs nga naka-enroll ha DTI Youth Entrepreneurship Program.
Sobra 15 nga mga young exhibitors an nagpartisipar ha mao nga expo kun diin pira ha mga produkto han mga ini amo an food products, kape, beauty and household products, home decors ngan damo pa nga iba.
