Ginpapanginano yana han Department of Trade and Industry (DTI) an mga hangyo han mga manufacturers han sardinas ngan noodles nga mag-umento ha presyo han ira mga produkto.
Sumala kan Trade Secretary Cristina Roque, mayda pira nga naghihimo han mga pangunahon nga papliton sugad han sardinas ngan instant noodles an karuyag nga magpatuman hin price increase.
Ginmalatumat hini nga gin aadman pa han DTI an nasabi nga mga hangyo.
An gin aaro nga umento ha presyo in mas hamubo ha 10 porsyento han presente nga kantidad han produkto.
Pag-eksplikar han mga manufacturer han sardinas, nagtitikahitaas an ira gastos ha transportasyon ngan operasyon. Kinahanglan hin gasolina han mga barko nga nangingisda, pati na gihapon an pagdadara hin mga dakop nga isda tikang ha mga pabrika.
Humitaas an presyo han fuel ngan logistics mahitungod ha nagpapadayon nga tensyon ngan kasamok ha Middle East.
Syahan na nga nakigsabot an DTI ha mga manufacturers han pangunahon nga papliton nga dire la anay mag-umento han presyo kutob Mayo 10.
Kaupod ha mga produkto nga sakop han DTI an canned sardines, gatas, tinapay, kape, instant noodles, bottled water, sabon panlaba, kandila, asin, canned meat, mga seasonings, ngan sabon pankarigo.
