Dakop han mga otoridad han Catbalogan City District Jail an usa nga 38-anyos nga babayi mahuman ini nga magprubar nga magsmuggle hin kontrabando ha sakob han pasilidad.
Basar han impormasyon nga dida han ginbuhat nga body search han mga otoridad ha nabisita nga babayi, in napansin han mga personahe han pasilidad nga mayda urusahon nga butol ha underwear hini.
Dayon naman nga ginkapkapan han usa nga female duty personnel an babayi ngan nadiskubrihan nga mayda nakatago nga maabot 40 ka-stick nga sigarilyo ha sulod han underwear hini kun diin, dayon naman nga ginkumpiskar han mga otoridad an nasabi nga kontrabando.
Sumala han babayi, nga ginsugo hiya han iya bugto nga PDL nga magdara hin sigarilyo agud ibaligya ha sakob para ha pan-gatas han anak.
Samtang, waray naman pasakahi hin kaso o sirot an babayi pero gintagan naman ini hin penalidad nga may pagtalapas ha City Ordinance No. 2024-011 han Catbalogan, nga nagdidire han pagsulod hin mga kontrabando ha prisohan.
