Ginpapamiling han mga Electric Cooperatives ha Sinirangan Bisayas an Auxiliary services o an mga reserba hiton suplay han kuryente ha National Grid Corporation of the Philippines, ha butnga han naabatan nga manual load dropping o rotational brownout han rehiyon.
Sumala kan Leyte III Electric Cooperative General Manager, Allan Laniba, nga ha ginbuhat nga pagharampang han mga kooperatiba ha Sinirangan Bisayas, ira ginpamiling ha NGCP kun nahingain an reserba nga suplay han kuryente mahitungod nga ini in ginbabaydan han kada-tagsa electric coop.
Dugang pa hini, nga magamit man o dire an reserba, in kada bulan ini nga ginbabaydan han mga kooperatiba ngan mga konsumidor.
Ginbabase an billing o panukot han NGCP an pinakadako nga boltahe nga nakokonsumo han usa nga lugar kada bulan. Ini nga boltahe in ginbabaydan la gihapon bisan man masukot iton rotational brownout, sanglit na-aangay la nga pamilngan o sukton liwat nira kun hain na iton reserba.
Sumala pa kan Laniba nga dire naman nira ginbabasol an buhatan, pero unta in ira gin-iiban an ira sukot mahitungod nga mayda man ada auxiliary ngan dire sagun-son iton mga pag-brownout mahitungod nga mayda man ada suplay.
Dugang pa han opisyal nga maaram an NGCP nga mahitaas iton demand han kuryente ha pag-abot han mga bulan nga mapaso iton panahon, ngan ginpatapud han system provider nga supresyente iton suplay han kuryente.
Pero nakikita naman yana nga mayda mga planta nga namag-shutdown rason han pagkakamayda hin mga yellow ngan red-alert status ha suplay han kuryente ha Luzon ngan Visayas Grid dida han mga nakalabay nga kun diin, dugang pa ni Laniba, nga kinahanglan namiling na hadto hin pamaagi an NGCP nga masolusyonan ini.
Samtang sumala pa han opisyal, ngaginbuhat na han mga electric coop an ira parte sanglit kinahanglan gihapon pagbuhaton han buhatan an ira mga responsibilidad nga malikyan iton mga rotational brownout, agud magin patas naman hira ha mga ginbabayad kada bulan han mga konsumidor.
