BUSINESS – Ginklaro han Bureau of Animal Industry han Department of Agriculture nga dire maapektaran an agricultural trade han Pilipinas mahuman ipatuman han China an ban ha pag-aangkat han baboy, wild boar, ngan mga produkto han baboy tikang ha nasud mahitungod ha tarhog han African Swine Fever.
Sumalaha DA-BAI, ginkilala nira an desisyon han Chinese authorities pero gineksplikar han ahensya nga dire pa naman nag-eexport han live pigs, wild boar, ngan mga produkto an Pilipinas pakadto ha China.
Basar ha notisya, nagpagawas an General Administration of Customs han China hin kamanduan nga nagdidire ha pagsulod han mao nga mga produkto tikang ha Pilipinas mahitungod ha ASF concerns.
Ginmalatumat pa han DA-BAI nga padayon an Pilipinas ha pagpapatuman hin mahugot nga biosecurity measures, kaupod an kontrol ha pagkiwa han hayop, culling o pagpatay ha mga naapektaran, ngan mas ginpakusog nga surveillance ha mga lugar nga may kaso o hataas an risk.
