TACLOBAN CITY – Papangunahan han Tacloban City Police Office (TCPO) an mahugot nga implementasyon han liquor ban ha bug-os nga syudad han Tacloban.
Ini in subay ha ginpagawas nga executive order ni Mayor Alfred Romualdez bahin han pagpapahugot han quarantine measures ha syudad kalakip na an pagdidire han mga public ngan private gatherings.
Sumala kan Pol. Capt. Marjorie Manuta, tagapagyakan han TCPO, kasugbong nira ha implementasyon han liquor ban an TOMECO ngan mga barangay opisyales.
Dugang pa hini nga epektibo yana nga adlaw an mahugot nga pagdidire ha pagbaligya, pagpalit o pagkonsumo han bisan ano nga klase hin makahurubog nga irimnon.
Nanawagan naman ini ha publiko nga magpartisipar ngan makipagkooperar han pagpatuman han mao nga balaud pinaagi han pagsaway o pagsumbong ha ira kun mayda makikit-an nga dire nasunod ha mao nga liquor ban.
