TACLOBAN CITY – Gin malatumat ni Philippine Chamber of Commerce and Industry Regional Governor, Eugene Tan nga duro hin kahitaas an inflation rate han nasud para ha bulan han Abril.
Mababaruan nga ada ha 7.2% an nahipatik nga inflation ha nasabi nga bulan kun diin duro ini nga mas hitaas kumpara ha 4.1% nga nahipatik dida han Marso han presente nga tuig.
Sumala kan Tan, ini in mahitungod na gihapon han presente nga krisis nga nae-eksperyensyahan han nasud kabahin han lana, kun diin apektado hini an ngatanan nga makinarya nga nagkikinahanglan hin lana ngan sugadman an transportasyon nga amu an pinakadako nga nakonsumo han nasabi nga produkto.
Dugang pa hini, lumaprak gihapon ha 2.8% an quarterly performance han Gross Domestic Product han nasud kun diin kun igkukumpara han kanan nakalabay nga tuig in mas hamubo ini.
An 7.2% inflation rate in an pinakahitaas nga nahipatik han nasud tikang dida han Marso 2023 kun diin lumahos ini ha projection ngan malaksi an pagsaka tikang ha 1.4% dida han Abril 2025.
Pira pa ha mga nakag-amot han hitaas nga inflatio in an pagkaon, non-alcoholic beverages, ngan renta ha balay ngan mga gamit ha panimalay.
