Ginstu-studyohan yana han Iran an panibag-o nga proposal han Estados Unidos agud humanon an kasamok ha Middle East samtang nagtitikakusog an kontrol han Iran ha Strait of Hormuz.
Sumala ha mga notisya han shipping industry, ginmalatumat han maritime intelligence firm nga Lloyd’s List nga sarado na an mao nga strait mahuman magpatuman hin mas mahugot nga clearance system an Iran para ha mga barko nga naagi dinhi.
Ginyayakan nga an Iran in nagbug-os hin bag-o nga ahensya nga nakapot ha pag-apruba han pag-agi han mga barko ha strait.
Mahitungod hini, ginbabana-bana nga aada ha 1,500 nga barko ngan sobra 20,000 nga tripulante an na-stranded ha Persian Gulf, sumala ha International Maritime Organization.
Samtang, kumpiyansa naman hi US President Donald Trump, nga posible mahuman dayon an kasamok, ngan ginmalatumat nga may maupay nga resulta na an mga paghisgot para ha kahimyang. Sugadman, nagpahimatngun gihapon hiya nga posible magpatuman hiya hin higher level strikes kun babaribaran han Iran an hangyo han US.
