BALITA ESPISYAL – Mahitungod ha subra nga pagkabaraka na ma lagas hin ulitawo an iya suhag nga lalaki, nagpaskil hin usa nga pampubliko nga anunsiyo an usa nga amay ha Tainan City agud magbiling hin maarasawa para ha iya 40-anyos nga anak. An hin-o man nga matchmaker an makakabiling hin babaye nga mapapangasawa ngan magigintulay agud maikasal an iya anak in makakarawat hin premyo nga 38,000 New Taiwan Dollars o P66,000.
An nasabi nga anunsiyo in nakasurat ha usa nga pula nga papel ngan nakapaskin ha pader han ira panimalay. Sumala hiton amay, nababaraka hiya nga diri na masusundan an ira lahi ilabi pa nga naawat an kinabuhi han iya ika-duha nga anak ha usa nga car accident walo katuig na an nakalabay. Dugang pa hini, an mga chracteristics nga iya gin bibiling para ha magigin-asawa han iya anak in mahusay, buotan, pasensyosa, ngan diri ma subra 35-anyos mahitungod nga gin kukunsidera hini an kakayahan nga magburod.
Samtang, an iya naman 40-anyos nga anak in kalmado la ha nagin anunsyo han iya tatay. Sumala hini, igin papaumaya nala hini ha tadhana an pagbiling hin paghigugma mahitungod nga diri man ini hiya nagdadali.
An nasabi nga ulitawo in may-ada stable nga trabaho ha automotive parts industry.
Nag-aalang naman pagreto an mga amyaw hini mahitungod nga sumala ha ira, diri na uso itun arranged marriage sugad man diri gud sugad kakilala an ulitawo mahitungod nga ha Kaohsiung City ini urog nag-uukoy ngan diri mismo ha panimalay hiton iya kag-anak. Ha kaluyo hini, nahimo la gihapon ini nga iristuryahon ha bug-os nga kumunidad ngan social media mahitungod han kinada-an nga istilo hin pagbibiling han ma-arasawa.
