LONDON, UNITED KINGDOM – Usa nga team hin 100 Italian chefs an nagkatitirok ha London agud himuon an usa nga dambuhala nga tiramisu nga mayda kahalaba nga 1,445 feet (440 metro), nga opisyal na nga ginkilala kumo pinakahalaba ha bug-os nga kalibutan.
An tiramisu in usa nga kilala nga pagkaon nga Italyano nga kilala kumo usa nga klase hin cold dessert.
Ginbubug-os ini han mga biskwit nga gintatawag nga ladyfingers (o savoiardi) nga binabad ha ‘matapang’ nga kape o espresso, ngan ginpatong-patong kaupod an usa nga malapot nga cream nga himo ha mascarpone cheese, asukal, ngan itlog.
Kaurugan ini nga ginbubudburan hin cocoa powder ha bawbaw agud maghatag hin balanse ha katam-is ngan kapait han kape.
Gin kumpirma han usa nga tinaglawas tikang ha Guinness World Records ha Chelsea Town Hall nga nalahusan hini an anay rekord nga 897 feet nga nahipatik ha Milan, Italy dida han 2019.
An higante nga dessert in ginbubug-os hin sobra-kulang 2.2 tonelada han mascarpone cheese, 50,000 kabug-os hin ladyfinger cookies, ngan sobra 3,000 nga bunay.
An world record attempt in ginpangunahan ni Mirko Ricci, nga dati na gihapon nga kumapot han kaparehas nga titulo dida han 2017.
