Usa nga taxidermied animal head nga ginhuna nga tikang la ha fox an nadiskubrehan nga kaparte ngay-an han usa nga rare Tasmanian tiger, usa nga species nga nagin extinct na dida han 1930s.
An specimen in syahan nga napalit han usa nga waray ngarani nga collector ha usa nga fair ha United Kingdom ha kantidad nga $67 la mahitungod nga nakakatawa daw an dagko hini nga mata ngan baga hin ngisi han usa nga cartoon character.
Ha pag-iha, iginbutang ini ha auction kumo usa nga “19th century fox head.” Didto napansin han usa nga 38-anyos nga natural history relic dealer nga hi James Cranfield, nga mahilig mangolekta hin kakaiba nga taxidermied fox heads.
Pero han kitaon niya hin maupay an litrato, dayun niya napansin nga dire ini usa nga fox. Tahap ni Cranfield, usa ini nga thylacine, nga mas kilala kumo Tasmanian tiger, usa nga carnivorous marsupial nga kaparehas han ayam ngan may-ada distinctive stripes ha luyo.
Agud makasigurado, nagbiyahe hiya kaupod an iya fiancée hin sobra tulo ka-oras tikadto ha auction house agud personal nga makita an specimen. Usa ha pinakadamo nga clue an ihap han ngipon hini. May-ada gihapon ini walo nga upper incisors, kumpara ha unom nga kaurugan nga may-ada an usa nga fox.
Mahitungod hini, gintawag ni Cranfields an discovery nga iya “holy grail” ngan determinado hiya makuha an specimen. Mahuman an bidding war, napalit niya an ulo ha kantidad nga sobra-kulang $85,000, labot pa ha sobra $13,500 nga fees.
Agud makumpirma an pangilal-an han hayop,iginpailarom an specimen ha X-ray ngan CT scan. Gin kumpirma han panginano nga tinuod ini nga thylacine ngan may-ada pa ini haroas perpekto nga preserved nga skull ha sulod han taxidermy mount.
An Tasmanian tiger in dati nga makikit-an ha Australia ngan Papua New Guinea. Hinay-hinay ini nga nawara mahitungod ha hunting, disease, ngan habitat loss, ngan namatay an urhi nga kilala nga thylacine ha usa nga zoo hadton 1936.
Subay ha report, ada sobra-kulang 815 thylacine specimens la an nakarekord ha International Thylacine Specimen Database, tikang ha gudti nga samples kutob ha full-body mounts.
Ginmalatumat ni Cranfield nga waray hiya plano nga igtago la ini kutob trophy. Karuyag niya himuon nga available an specimen ha mga scientists ngan academic institutions agud magamit ha kadugangan nga pag-aram kasumpay ha extinct nga hayop.
.jpg "PCO, pahuhugton an pakikigbinuligay ha media kontra fake news")
