TACLOBAN CITY– Ginpahibaro han Tacloban City Veterinary Office, nga nagkakamayda hira yana hin simultaneous vaccination para hiton mga ka-ayam ha syudad han Tacloban.
Sumala kan Dra. Eunice Alcantara, Head City Veterinary Office, an nasabi nga panbakuna in kasumpay ha pagsalin-urog hiton Rabies Awareness Month yana nga bulan hiton Marso.
Dugang pa ni Alcantara, syahan nagdumara hira hin information campaign han Marso 3, ha kada barangay kasumpay hiton importansya han pagpapabakuna hiton ira mga alaga nga hayop, ngan usa ha ira mga benepisyaryo nga gin-edukar an mga 4ps beneficiaries.
Ginmalatumat pa ni Dra. yana nga semana duha nga barangay an ira ginlilibot para hiton vaccination han ka-ayaman, an ira team in aadto ha Caibaan pakadto ha Marasbaras area.
Ginatagan duon ni Alcantara, nga dire karuyag sidngon nga mahuhuman na an Rabies Awareness Month in maghuhuman na gihapon an ira panbakuna, ine in magpapadayon kutob ha bulan hiton Disyembre 2025.
Nanawagan naman ine ha publiko, partikular na adton may mga alaga nga hayop nga siguraduhon nga naka-bakuna an mga ine, matungod nga posible makag-kawsa hin kadelikaduhan an ira alaga nga hayop ha iba nga tawo pananglitan aksidente ine nga maka-kagat.
Gin-aaghat naman hine an ngatanan, nga magin responsable nga pet-owners.
