NATIONAL – Utro nga gintagan-duon ni Speaker Ferdinand Martin Romualdez nga an West Philippine Sea in kaparte han teritoryo han Pilipinas ngan an pagdepensa hine in importante para ha national security.
Ine an nagin pahayag ni Speaker Romualdez kadungan han iya promosyon kumo Auxiliary Vice Admiral han Philippine Coast Guard (PCG).
Gin atenderan an seremonya han mga opisyal han Coast Guard nga ginpangunahan nira Admiral Ronnie Gavan ngan Vice Admiral Edgar Ybañez.
Ginpahayag han Spekaer nga dire ine matugot nga magin dehado an Pilipinas ha kalugaringon nga kadagatan sanglit dire ine mapapirde ha kalugaringon nga teritoryo.
Gintagan-duon pa hine nga an Coast Guard an syahan nga depensa han nasud kontra ha agresyon, panhahadlok, ngan ilegal nga pagsulod han nga langyawanon nga sakayan pandagat.
Kumo Speaker han Kamara, ginmalatumat hine nga padayon hine nga igduduso an nasyunal nga soberanya ngan integridad han teritoryo.
