Nanguna an Land Transportation Office (LTO) ngan Social Security System (SSS) ha listahan han mga ahensya han gobyerno nga mayda pinakadamo nga reklamo dida han Marso, subay ha Anti-Red Tape Authority (ARTA).
Basar ha datos han ARTA, umabot hin 152 an kabug-usan nga reklamo nga ira nakarawat, kun diin 132 na an naresolba ngan 20 pa an nagpapabilin nga aktibo. Samtang, nakaghipatik an SSS hin 156 nga reklamo, kun diin 1112 na an naresolba ngan 44 naman an nakabinbin pa.
Sumala kan ARTA Secretary Ernesto Perez, kadam-am ha mga reklamo in may paghisumpay ha pagkadelatar han serbisyo, kadugangan nga rekisitos, ngan pagtalapas han Citizen’s Charter.
Duon pa ni Perez, padayon an pakikigsumpaya han ARTA ha mga ahensya agud mapaupay an ira serbisyo ngan maibanan an red tape.
Kaupod gihapon ha mga mayda hitaas nga ihap han reklamo in an Bureau of Internal Revenue (BIR), Food and Drug Administration (FDA), Land Registration Authority (LRA), Philippine Statistics Authority (PSA), Department of Education (DepEd), National Telecommunications Commission (NTC), Department of Migrant Workers (DMW), Professional Regulation Commission (PRC), Department of Human Settlements and Urban Development (DHSUD), ngan Department of Science and Technology (DOST).
Para naman ha mga Government-Owned and Controlled Corporations (GOCCs), kaupod ha mayda pinakadamo nga reklamo an Pag-IBIG Fund, Philippine Health Insurance Corporation, Philippine Postal Corporation, Landbank of the Philippines, ngan GSIS.
Sugadman, ginmalatumat han ARTA nga kadam-am ha mga reklamo in daun nga gin aaksyunan kun naipasa na ha mga kaangayan nga ahensya, ngan nahipatik gihapon an dako nga porysento han mga kaso nga naresolba.
Dugang pa han ahensya, an kadamo han reklamo in dire la indikasyon han inefficiency kundi kasumpay gihapon han kadamo han transakyon nga ginkakaptan han mga nasabi nga opisina.
