Ginpabuto ha pinakasyahan nga paggmit an Tomahawk mid-range missile han Estados Unidos ha Tacloban City kumo kaparte han Balikatan Exercise dinhi ha Pilipinas.
Ginkumpirma ni Armed Forces of the Philippines (AFP) Spokesperson Colonel Dennis Hernandez nga ginamit an Typhon Mid-Range Capability missile system agud magpalupad hin Tomahawk land attack missile tikang Tacloban City banda alas-12:12 han maagahon dida han Martes, nga umigo ha target area hini ha Laur, Nueva Ecija banda ala-1 han maagahon.
Ginbabana-ban nga umabot hin sobra-kulang 630 kilometro an kahirayo nga ginsubay ha missle ugsa hini naabot an target.
Sumala kan Hernandez, usa nga missile la an ginbul-iwan ha nasabi nga paghag-id.
Igin eksplikar gihapon hini nga an lokasyon ha Tacloban in sakto para ha sugad nga klase hin test mahitungod ha kapas hini nga maglunsar hin missiles ha halaba nga distansya tikadto ha targe.
An aktibidad in kaparte han mas haluag nga training scenario nga konektado ha Joint Pacific Multinational Readiness Center (JPMRC), nga igin lakip ha tinuog nga Balikatan drills.
“This is a land-based scenario… the JPMRC supports that ground activity, ground attack,” sumala kan Hernandez.
Manunumduman nga iginpakita la hadto an nasabi nga missile system ha mga nakalabay nga SALAKNIB exercises ngan waray pa ini aktwal nga pabutha, samtang gin aadman pa han mga AFP personnel an paggamit hini.
Samtang, gin kondena naman ni House Deputy Minority Leader ngan ACT Teachers party-list Rep. Antonio Tinio an pagpapabuto han Tomahawk cruise missile.
Sumala kan Tinio, nakakabaraka an paggamit han Tacloban Airport kumo launch site para ha usa nga missile system, ngan dire ini angay igkonsidera nga ordinaryo nga military exercise la.
“The use of Tacloban Airport—a civilian facility—as a launch site for a US missile is an extremely alarming escalation,” duon niTinio.
“This is not a ‘routine exercise’; this is live-fire testing of an offensive weapon system on Philippine soiL,” dugang pa han kongresista.
