TACLOBAN CITY – Dead on the spot an usa nga senior citizen mahuman an natabo nga insidente ha Brgy. San Pedro Sta. Rita Samar
Ginkilala an biktima kan Liza Gutiay, 66-anyos ngan residente han San Antonio Basey Samar.
Sumala kan PCpl. Romaldo Pacaanas, Duty Investigator Sta. Rita MPS, nga tipauli na an biktima kaupod an iya anak nganhan nakada na hira ha Brgy. San Pedro nga dapit kun diin mayda mga nag-iiskrap nga dapit ngan kun papanginanuon ine nga karsada in haligot la ine matungod nga nalulukop na iton karsada iton mga scrap materials.
Ha mao nga takna, samtang ginsusubay han biktima kaupod an iya anak an karsada in tigda nala kumuha an usa nga scrap workers hin hilaba nga puthaw, kun diin nasagi ine han ginsasakyan nga single nga motor kahuman in nahilabog an biktima ha kaluyo nga lane han karsada, ngan iksakto naman nga mayda naagi nga truck kun diin nailarom an biktima ha truck nga nagin kawsa han iya dayon nga kamatayon.
Ginkilala naman an driver han truck nga hi Jomar Rosauro Bolambao, 41-anyos ngan residente han Taguictic San Jose Tacloban City.
Ginkilala gihapon an scrap worker kan Kenneth Vergara ada ha sakto nga pangidaron, ngan residente han San Pedro Sta. Rita Samar.
Hapagkayana, temporaryo nga kapot na hiton mga kapulisan an driver han truck ngan scrap worker, ngan ginpipinalisa na han mga ine an kaangayan nga mga kaso nga kaka-atubangon han duha nga responsable ha natabo nga insidente.
