NATIONAL – Mas ginpahurugot pa an kampanya kontra ha anomalya ha gobyerno mahuman ighaon kanina hiton aga ni Department of Public Works and Highways (DPWH) Secretary Vince Dizon an syahan nga batch han mga kaso nga kriminal ha Office of the Ombudsman.
Target han mga ine an pira nga mga opisyal han DPWH ngan mga contractor nga daw dabi ha maanomalya nga flood control projects ha magkalain-lain nga parte han nasud.
Kalakip ha mga ginpailarom ha imbestigasyon an mga tinaglawas han Bulacan 1st District Engineering Office, kalakip na hira anay district engineer Henry Alcantara nga hi Brice Hernandez, nga presente naka-preso ha Pasay City Jail mahuman sirotan hin contempt order han Senate Blue Ribbon Committee. Kalakip gihapon ha mga papasakahan hin kaso an mga contractor sugad han Wawao Builders, Syms Construction Trading, ngan St. Timothy Construction Corporation, nga gintatag-iyahan han mag-asawas nga Curlee ngan Sarah Discaya.
Dugang pa ni Dizon, an mga kaso nga ginsalawad in non-bailable ngan kasumpay ha ghost projects, substandard nga konstruksyon, ngan sabwatan ha bidding process.
