THE HAGUE, NETHERLANDS – Ginhahangyo han International Criminal Court Prosecution nga ibasura an hangyo ni anay Presidente Rodrigo Duterte nga tugutan iapela an desisyon han korte nga nagkukumpirma ha mga kaso kontra ha iya kasumpay ha extrajudicial killings han hiya in alkalde han Davao City ngan ha panahon han iya pagkapresidente.
Ha usa nga 12-page document nga may petsa nga Mayo 4, ginduon han Prosecution ha ICC Pre-Trial Chamber I nga waray bag-o an ginkakaatubang ni Duterte ngan an ira apela in nakabasar la ha dire pag-abuyon ha desisyon han korte.
Duon pa han prosekusyon, sayop an interpretasyon han kampo ni Duterte ha nagin desisyon han ICC, labi na ha charges. Sumala hini, nga klaro nga ginhihisgotan han korte an mga detalye han kaso ngan ginpapamatian an mga argumento han magkalain nga kampo ugsa magpagawas hin desisyon.
Ginsukna gihapon han Prosecution an pira nga pahayag han legal team ni Duterte ha media, kun diin gintawag an ICC nga “biased” ngan “self-serving.” Sumala ha ira, an mga abogado in kinahanglan nasunod ha Code of Conduct, pero padayon la gihapon an sugad nga mga pahayag nga nakakaruba ha integridad han korte.
