NATIONAL NEWS– Ginduduso ni reelected Leyte Rep. Ferdinand Martin G. Romualdez, an balaodnon nga nagpapanuyo nga ig-repeal an E-GASTPE law ngan balyuan ine hin mas haluag nga voucher system para ha mga estudyante ngan magturotdo ha mga pribado nga eskwelahan.
Ginsalawad ni Romualdez an balaodnon nga Private Basic Education Vouchers Assistance Act o House Bill (HB) No. 4 ha pag-abre han 20th Congress ka kulop nga adlaw.
Panuyo gihapon hine nga makaghimo hin bag-o nga Bureau of Private Education ha ilarom han Department of Education nga magtatagmangulo ha pagpatuman han voucher subsidies, mga programa nga suporta para ha magturotdo, ngan bulig para ha institutional development han mga private schools.
Ha ilarom han balaodnon, an mga kwalipikado nga estudyante in tikang ha
middle-income ngan mga kablas nga pamilya, in tatagan hin government-issued vouchers agud nga makag-aram an mga ine ha pribado nga basic education schools.
Lain la an kantidad hiton voucher depende ha kabutangan han pakabuhi han pamilya han estudyante kun diin tatagan ine hin prayoridad.
Kalakip gihapon ha balaodnon an pagpapadig-on han Teachers’ Salary Subsidy Fund ngan In-Service Training Fund agud nga mapabilin nga mapa-ursa pa han mga magturotdo ha pribado nga sektor an ira panutduan.
