Igin malatumat han Department of Energy (DOE) nga imposible na nga maibalik ha P60/litro an mga presyo han krudo ngan petrolyo mahitungod ha nagin mga epekto han giyera ha Middle East.
Sumala kan Energy Secretary Sharon Garin, ini in mahitungod ha mga nagin structural damages nga usa ha mga nagin epekto han giyera ha rehiyon kun diin gin tagan duon han sekretarya nga nagpapabilin nga waray kasiguradohan kun san-o maundang an gyera ug kun kutob san-o paghihimuon nga pag-aayos han mga oil-related facilities.
Dugang pa hini, kun duha ka semana la nag iha an tensyon, mas may-ada posibilidad nga maibalik an dati nga presyo han lana pero mahitungod nga pira na ka semana an nakakalabay tikang mag tikang an gyera, in diri magigin madagmit an paghimubo han presyo han mga produkto petrolyo.
Samtang, ha kaluyo hini in nagpapadayon an gobyerno ha paghatag han mga fuel subsidies para ha mga drivers nga apektado han hitaas nga presyo han petrolyo.
Labot la hini, may-ada iba pa nga mga programa nga iglulunsar para maibanan an epekto han hitaas nga presyo han krudo ha mga motorista sugad han pagpapatuman hin mga discounts para ha mga jeepney drivers nga nakikita nga maihahatag ha mga tsuper ha sakob hin tulo ngada ha upat ka bulan.
