NATIONAL – Pabor an pira nga senador nga ha Agosto 4 na o usa kasemana kahuman han State of the Nation Address (SONA) ni Pangulong Ferdinand Marcos Jr., tikangan an impeachment trial kontra kan Vice President Sara Duterte.
Sumala kan Senador Joel Villanueva, nagkamay-ada hin informal talks o pag irustorya an pira nga senador kaupod hi Senate President Francis “Chiz” Escudero kun sano posible mag-convene an Senado kumo impeachment court.
Sigurado daw nga papakianhan pa ni Escudero an mga senador kasumpay hine ngan para kan Villanueva, kumporme hiya nga tikangan an pagdungog usa kasemana mahuman an SONA han presidente.
Pag-eksplikar han senador, kinahanglan nga maayad anay an ira mga kalugaringon para ha paghurar han lider han 20th Congress, Committee Chairmanship, ngan sugad gihapkn an pagbubuhaton han ira counterpart ha Kamara.
Sugadman, gin klaro ni Villanueva nga waray pa pinal nga desisyon kasumpay han panukala pero upat ngada ha unom nga senador na an nagpahayag han ira pag-abuyon nga ha Agosto 4 na mag-convene.
Manunumduman nga nagpagawas hin proposed calendar hi Escudero para ha tikaharani nga impeachment proceedings kontra kan VP Sara.
