STOCKHOLM, SWEDEN – Sobra duha ka-dekada na an naklalabay, pero nagpapabilin nga waray nakakapirde ha Guinness World Record han usa nga lalaki tikang ha Sweden mahuman niya mabug-os an pinakagutiay nga motorsiklo ha bug-os nga kalibutan.
Tuig 2003 han himuon ni Tom Wiberg an sarakyan nga gintawag niya nga “Smalltoe.” Ha sobra ka-gutiay hini, sigo ini ha palad han usa ka-tawo. Mayda la ini wheelbase nga 3.14 inches ngan lingkoran nga 2.55 inches.
Natimbang naman an bug-os nga motorsiklo hin 1.1 kilos.
Ha kaluyo han kadako hini, nagana ngan tunay nga nasasakyan an Smalltoe. Ha bulig han espesyal nga sapatos nga may attachments, malinampuson hini nadradrayb ni Wiberg ha kahirayo nga sobra 10 meters.
Ginpapadalag ini hin 0.3 hp nga makina ngan naabot ha kadagmit nga duha ka kilometro kada oras.
Nalahusan ni Wiberg an anay record han 1990 nga nahipatik nira Simon Timperley ngan Clive Willams tikang ha UK.
Sumala ha Guinness, kun may naruruyag nga agawon an titulo ni Wiberg yana, kinahanglan nira nga maghimo hin usa nga butang nga mas gutiay pa ha usa nga mulayan pero akos paandaron han usa ka-tawo.
