ORMOC CITY – Nagin malinampuson an gindumara nga Piña Festival Parade of Lights ha Ormoc City, dida han nakalabay nga adlaw, Hunyo 29.
Kun diin ginparayaw han magkaduro-dilain nga mga organisasyon ngan pan-negosyohan han Ormoc City an magkaduru-dilain nga floats han Piña Festival Parade of Lights 2025 nga may-ada tema nga Fantasy & Sci Fi Movie kaparte han pagsalin-urog han kapatronan han siyudad.
Yinukot-yukot nga magkirigta tikang ha magkaduro-dilain nga parte han Eastern Visayas gihapon an tumambong agud makit-an an makulay ngan engrande nga selebrasyon han sining, kultura, ngan talento han mga Ormocanon.
Usa naman an non-competing contingent nga amo an Orcham-Execom Ormoc City.
Nakuha naman han Space Exploration nga himo ni Rex Morales an siyahan nga pwesto kun diin nakakarawat hiya hin P500,000, ikaduha naman nga pwesto an Monsters Inc. han E-Garage nga nakapag-uli hin P400,000, samtang nakuha naman han grupo han Mhaey Tanael Photo & Video nga may tema nga Mulan an ika-tulo nga pwesto nga may premyo nga P300,000.
Nakakarawat gihapon hin P100,000 nga consolation prizes an iba pa nga mga contingents. (via Bombo Shiela Encio)
