HINABANGAN, SAMAR – Natad-an han mga tropa han gobyerno an naagnas na nga lawas han usa nga gintutuohan nga miyembro han armado nga grupo ha Hinabangan, Samar.
Sumala ha militar, nadiskubre an lawas samtang nagbubuhat hin operasyon an mga ini ha tay-aw nga parte han lugar kasunod han nauna nga engkwentro kontra ha walhon nga grupo dida han Pebrero 25, 2026 ngan gintutuohan nga namatay ini ha butnga han operasyon.
Ginkumpirma an patay nga lawas han mga anay miyembro ngan kaurupdan hini ha New People’s Army. Ginmalatumat han mga otoridad nga umilarum ha berepikasyon an cadaver ha pamamagi han mga nakuha nga personal nga gamit ngan pakikipagsumpayan ha mga pamilya hini ngan lokal nga mga residente.
Ginkilala an patay nga lawas kan alyas “Hunyo”, sekretarya han SRC Sesame Regional Party Committee kun diin, gindara an lawas hini ha kahirani nga istasyon han pulisya para ha forensic examination ngan insakto nga dokumentasyon.
Padayon naman an ginbuhat nga operasyon han mga pwersa han gobyerno ha lugar agud matudlok pa an iba nga miyembro han grupo nga gintutuohan nga aada pa ha mao nga lugar.
Nanawagan naman an militar ha mga nabibilin nga rebelde nga sumurender ngan samantalahon an mga programa han gobyerno ngan bumalik ha sosyedad.
