VILLABA, LEYTE — Pormal na nga titikangan an konstruksyon an pinakasiyahan ngan pinakadako nga banana processing center ha Villaba, Leyte kumo kaparte han proyekto nga may panuyuan nga pakusgon an industriya han saging ha Sinirangan Bisayas.
Sumala kan Villaba Leyte Municipal Relation Officer, Teddy Vapor nga an panuyuan han processing center in himuon nga mas episyente ngan moderno an pagproproseso han cardaba banana, partikular na an paghimo hin mga produkto tikang ha mga saging. Kaupod han proyekto an lugar han Villaba, Tabango, ngan San Isidro, kun diin an mga parag-uma ha magkadurudilain nga kooperatiba an magsusuplay hin saging.
Sumala ha Department of Agriculture, magamit an pasilidad hin makabag-o nga teknolohiya ha pagpoproseso ngan masunod ha standard han food safety agud masigurado an kalidad han produkto ngan mapahaliwg an merkado hini, kaupod an posible nga pag-export.
Ginlalauman nga makakagdara an proyekto hin mga oportunidad ngan trabaho para ha mga lokal nga residente. Ginlalauman nga sobra 100 ka-trabaho an mahihimo ha operasyon han center, labot pa ha mga temporaryo nga trabaho han konstruksyon.
Labot la ha dugang nga pakabuhi, ginlalauman nga mahitaas gihapon an halin han mga parag-uma ha pamamaagi han mas maupay nga supply chain ngan direkta nga sumpayan ha merkado. Panuyuan hini nga pakusgon an agribusiness sector ha rehiyon ngan himuon nga sentro an Leyte ha pagproseso han produkto hiton saging.
Dida la han nakalabay in ginbuhat an groundbreaking ceremony han proyekto, nga gintutudlok nga importante nga pitad ha modernisasyon han agrikultura nga pagparibhong ha ekonomiya ha Sinirangan Bisayas.
Maabot naman ha 2 ka-hektarya an kadako han processing center nga kun diin, sumala kan Vapor nga plano nga mas pahaluwagon pa an kadako hini ha mga tuig nga malabay.
