Nag pahimatngon an Presidential Communications Office (PCO) kontra ha nagsasarang nga mga sayop na impormasyon kanit ha pag abuso ug pag samantala han presente nga sitwasyon ha enerhiya han nasud.
Ha naging pamahayag ni PCO Secretary Dave Gomez, gin malatumat hini nga ma atubang hin sirot ha ilarom han balaod an hino man nga may intensyon magpakalat ngan mag himo hin peke nga balita online.
Nagpahinumdom ha hi Secretary Gomez nga an pagpapakalat hin “fake news” in may-ada sirot nga kutob unom ka-bulan nga pagkakapriso basar ha Revised Penal Code.
Kun ini in gin himo online, in magdodoble an kakaatubangon nga sirot ha ilarom han Cybercrime Prevention Act.
Subay pa kan Gomez, an disinformation in nag guguba han pagtapod han publiko, nagpapahinay ha ekonomiya, ngan nagbubutang ha katalagman han mga kinabuhi han mga Pilipino ilabi na yana nga panahon nga na atubang hin krisis ha enerhiya iton nasud.
Gin tagan duon pa hini nga diri papalabayon han gobyerno an bisan ano nga pitad nga may-ada panuyo nga magpasarang hin sayop nga impormasyon para ha pan kalugaringon o pampulitika nga interes.
Sumala pa hini, gin tutudlok kumo seryoso nga pagtalapas an bisan ano man nga may-ada panuyuan wurokon an publiko ha seguridad, suplay, ngan presyo han enerhiya.
Gin malatumat pa ni Gomez nga makikipag-sumpayan an PCO ha Department of Justice (DOJ) agud magpasaka hin kaso kontra ha mga mapapamatud-an nga nagpapakalat hin mga sayop nga impormasyon.
Labot la hini, gin papakusog gihapon han ahensya an pagbabantay ha social media sugad man ha iba pa nga mga agianan han impormasyon agud matudlok ngan mapugngan an mga organisado nga mga kampanya han disinformation, kasugbong na an Oplan Kontra Fake News.
Gin-aaghat pa ni Secretary Gomez an publiko nga magin responsable ha paghahatag hin impormasyon ug siguraduhon nga beripikado an mga ini ugsa pa man igpakalat agud malikayan an posible nga danyos ha publiko.
