Igin suhestyon ni Senador Panfilo “Ping” Lacson nga mayda alternatibo nga paagi agud maka-atender an mga senador nga naaatubang ha posible nga pag-aresto o pagkakapreso ha impeachment trial ni Vice President Sara Duterte, hin dire na kinahanglan gumamit hin online participation.
Sumala kan Lacson, pwede umaro an Impeachment Court hin katugutan o “leave of court” tikang ha Sandiganbayan o iba pa nga korte kun diin nakabinbin an kaso han mga apektado nga senador.
Kun tugutan ini, pwede hira dad-on ha Senado pinaagi han Bureau of Jail Management and Penology agud maka-atender hin personal ha pagdungog.
Duon pa, dire gintutugutan ha presente nga Senate Rules an online participation ngan voting labot nala kun may-ada kalamidad, force majeure, o national emergency.
Gintagan-duon gihapon ni Lacson nga an impeachment trial in usa nga espesyal nga hukuman ha senado nga gintudlok han Konstitusyon, sanglit kinahanglan an pisikal nga presensya han mga senator-judges.
Nagpahimatngon gihapon ini nga an online participation in pwede magin delikado ha mga nagtatago o ginbibiling han otoridad, mahitungod nga posible ma-track an ira lokasyon pinaagi han ira internet connection, sugad han IP address.
Ha kaso ni Senador Ronald “Bato” dela Rosa, ginmalatumat ni Lacson nga pwede magamit han mga law enforcement an online attendance agud matudlok an iya kinamumutangan kun hiya in magla-laog in ha sesyon gamit an laptop o mobile device.
Hi Dela Rosa in naaatubang ha arrest warrant tikang ha International Criminal Court (ICC) kasumpay ha war on drugs han administrasyon Duterte, samtang an pira nga senador in naaatubang gihapon ha magkadiru-dilain nga kaso han graft ngan plunder may paghisumpay ha flood control scandal ngan campaign donations.
