TACLOBAN CITY– Ginhangyo ni Pangulong Ferdinand Marcos Jr. an courtesy resignations han tanan nga iya cabinet secretaries usa nga pitad agud nga i-calibrate an iya administrasyon kasunod han dire maupay nga resulta han nakalabay nga piniliay.
Subay hiton Presidente, panahon na para ig-realign an gobyerno ha mga ginlalauman nga tawo.
Gintagan duon han Pangulo nga dire in business as usual matungod nga nagyakan na an publiko ngan ira ginlalauman an resulta dire pulitika.
Subay ha Palasyo, an hangyo nga courtesy resignation in panuyo nga tagan hin higayon an Pangulo nga ig-evaluate an performance han kada-departamento ngan tudlukon kun hino pa an padayon nga magsisirbe ha administrasyon ha igpapatuman nga recalibrated priorities.
Gindig-unan pa han Pangulo nga waray kalabutan dinhi an personalidad matungod nga kasumpay ine ha ira performance.
An nasabi nga pitad in para ha mas pokus nga performance driven approach.
Dugang pa han Presidente, nga an mas kinahanglan yana in an madagmit nga papatuman ha mga importante nga proyekto ngan programa han administrasyon.
Ginsigurado naman han Malakanyang nga dire madedelatar an serbisyo han gobyerno kahuman han nagin panawagan nga courtesy resignation han mga cabinet secretaries.
