TACLOBAN CITY – Gin pahibaro han Department of Agriculture Eastern Visayas nga kada-adlaw nira ginbabantayan an pagkiwa han presyo han mga papliton ha mga dagko nga merkado ha rehiyon, kalakip na an Tacloban City Public Market.
Sumala kan Department of Agriculture Eastern Visayas Agri-business Industry Support Section Chief, Marilou Saporas, nagkakamay-ada la hin pagkiwa ha presyo han mga papliton kun may-ada mga bag-o nga deliveries han mga papliton.
Dugang pa hini, otomatiko nga nag-iiba an presyo han mga pangunahon nga papliton kun nagkakamay-ada hin bag-o nga stocks o delivery han mga produkto kun diin nadepende gihapon ini ha kalidad han produkto—kun de-kalidad o diri.
Usa pa ha mga rason in kun diin nga lugar nagtitikang an produkto mahitungod nga kaurugan han mga produkto nga ginbabaligya ha merkado-publiko han Tacloban, labi na an mga utanon in nagtitikang pa ha gawas han syudad.
Kalakip na gihapon ha iginkokonsidera an presyo han gasolina o produkto nga lana nga ginagamit han sarakyan nga nagdadara han produkto tipadkto ha merkado.
Gin malatumat naman ni Saporas, nga ha pagkayana in stable an pamresyuhan han mga pangunahon nga produkto mahitungod nga may-ada supresyente nga suplay nga nakukuha an sydudad tikang ha mga suppliers hini.
