Usa nga 63-anyos nga lalaki ha Norway an iginkonsidera nga haros naupay o “cured” tikang ha HIV mahuman magpailarom ha stem cells transplant tikang ha iya bugto, subay ha mga doktor dida han Lunes.
Subay ha mga researchers, an bugto han pasyente in mayda talagsaon nga genetic mutation nga kaya pugngan an virus nga makasulod ha mga cells han lawas.
An pasyente, nga gintawag nga “Oslo patient,” in mayda HIV tikang pa dida han 2006 ngan na-diagnose gihapon ini hin grabe nga blood cancer nga myelodysplastic syndrome hadton 2017.
Mahitungod hini, kinahanglan niya hin stem cell transplant agud tambalon an cancer. Ha pamiling hin donor, napili niya an iya maguran nga bugto. Duro naman an kakalas han mga doktor han mahibaruan ha mismo adlaw han transplant dida han 2020 nga an bugto hini in mayda CCR5 gene mutation nga nagpupugong ha HIV.
“We had no idea… That was amazing,” sumala kan Dr. Anders Eivind Myhre han Oslo University Hospital.
Subay ha pag-aram, makalabay an duha katuig in gin undang han pasyente an pag-inom hin anti-retroviral drugs. Waray na nakita nga marka hin HIV ha iya dugo, bituka, ngan bone marrow.
“For all practical purposes, we are quite certain that he is cured,” dugang pa ni Myhre.
Dugang pa han mga doktor, an pasyente in ada na maupay nga kabutang ngan mas makusog na yana an pan-abat.
Sugadman, gin malatumat han mga eksperto nga an sugad nga procedure in delikado ngan gingagamit la ha mga pasyente nga mayda HIV ngan grabe ngan blood cancer, sanglit dire ini praktikal para ha kadam-an han mayda HIV.
Gintotoohan han mga researchers nga makakabulig an mga sugad nga kaso agud mas maintindihan HIV ngan makabiling hin posible nga tambal para ha mas damo nga pasyente ha mga masunod nga panahon.
