Balabag an gobyerno han syudad han Davao ha plano nga pagtutukod hin foreign military ha rehiyon, kasunod han report nga posible magtukod hin fuel storage facility ha Davao.
Syahan na nga ginmalatumat han Armed Forces of the Philippines (AFP) nga ginsusuportahan hini an nasabi nga proyekto ha Mindanao, mahitungod nga makakabulig ini ha pagkakapakusog han depensa ngan operasyon han militar, kaupod ha West Philippine Sea.
Sugadman, iginduon han lokal nga pangobyernuhan nga dire hini susuportahan an proyekto kun waray ini direkta nga benepisyo ha publiko, labi na ha butnga han naghihinitaas nga presyo han lana ngan papaliton durot han kasamok ha Middle East.
Sumala manggud ha United States Naval Institute, plano han Pentagon nga magtukod hin Defense Fuel Support Point (DFSP) ha Southern Philippines pag-abot han 2028. An pasilidad in ginlalauman nga magtitirok hin 41 milyon ka-galon hin lana ngan iba pa nga produkto nga petrolyo para ha operasyon han militar han Estados Unidos.
Maduon gihapon nga ginbaribaran han Bagong Alyansang Makabayan (BAYAN)-Southern Mindanao an proyekto, nga sumala ha mga ini, pagtalapas ha soberanya han nasud ngan posible magbutang ha rehiyon ha kadelikaduhan kumo posible nga target han mga kaaway han US.
Samtang, gin sigurado naman han AFP nga an nasabi nga pasilidad in magpapabilin nga kontrol han Pilipinas ngan magseserbi nga panagang kontra ha mga hulga ha seguridad.
