Usa nga urusahon nga insidente an nahitabo ha syudad han Wuhan dida han gab-i han Marso 31 mahuman dudrungan nga umundang ha pag-andar an sobra 100 nga self-drivring taxi, nga nagbilin ha mga pasaheros hini nga na-trap ha butngan han duro nga trapik.
Subay ha report han Traffic Management Bureau han China, nagtikang umuran hin mga reklamo banda alas-8:57 han gab-i. Nahibaruan nga an ngatanan han pumalya nga sarakyan in kaupod ha “Apollo Go”, usa nga ride-hailing service nga waray human driver nga gintatag-iyahan han Chinese IT company nga Baidu. Mahitungod ha aberya, mayda pira nga pasaheros an na-lock ha sulod han sarakyan hin kutob 90 minutos. An iba naman in waray makagawas mahitungod ha kahadlok nga maaksidente ha butnga han busy nga karsada.
Ha usa nga social post, igin paangbit han usa nga pasaheros an iya makaharadlok nga eksperyensya mahuman hiya ma-trap hin haros usa ngan tunga kaoras ha usa nga overpass nga napapalibutan hin mga dagko nga dump truck. Gin batikos hini an costumer service han Apollo Go nga waray daw makabulig ngan pauru-utro la nga ginpapahayag nga mayda hira ginpadara nga specialist imbes nga maghatag hin klaro nga emergency procedure.
Nagsarang online an mga video han mga nakaundang nga robotaxi nga naglalaga an mga signal light ha magkadiru-dilain nga parte han Wuhan. Bisan man kun mayda mga nahipatik nga pagbunggo ha iba nga sarakyan, waray naman nahipatik nga nasamaran.
Ha inisyal nga pahayag han Apollo Go, gintudlok nira nga “system failure” ha ira centralised management system an rason han dudrungan nga pagplaya han mga sarakyan.
