TACLOBAN CITY – Nakatalaan nga igpadayon han Department of Social Welfare and Development (DSWD) Regional Office 8 ha masunod nga semana o ha bulan han Agusto an payout han social pension ha mga benepisaryo hini ha bug -os nga rehiyon para han nakalabay nga tuig 2019.
Sumala kan Vina Aquino, tagapagyakan han DSWD Regional Office 8, maabot na ha 60% han mga social pensioners ha rehiyon an nakakarawat na han ira mga ayuda ngan sunod nga semana in igpapadayon an payout hini kun diin matitigda nga P6,000 an makakarawat han mga benepisaryo tungod han bago nga guidelines nga kinahanglan nga kada semester an payout hini o kada unom kabulan ha kada tuig.
Nakatalaan naman nga igdownload han DSWD an pondo ha 11 nga mga LGUs ha rehiyon nga asya nala an magpi-payout ha mga benepisaryo han ira tagsa-tagsa nga bungto.
Sunod naman nga igrerelease han DSWD an payout para han 2020 social pension.
Nangaro naman hin pag-intindi an mao nga opisyal ha mga benepisaryo bahin han pagkadelatar han payout tungod han pandemya ngan han ira ginbuhat nga validation agud nga magkaada hin malimpyo nga listahan han social pensioners ha rehiyon.
