TACLOBAN CITY – Padayon an gindudumara nga imbestigasyon hiton mga otoridad kasumpay ha natabo nga panikas ngan pamatay ha duha nga senior citizen ha Brgy. Tinago, Palompon, Leyte.
Ginkilala an mga biktima kanda Josefina Sumayong, 62 anyos, retired teacher ngan Lourdes Verano, 79 anyos an pangidaron ngan residente han nasabi nga lugar.
Sumala kan PMAJ Ronald Espina, Chief of Police, Palompon, Leyte, nga subay ha ira gindumara nga inisyal nga imbestigasyon, nga natabo an insidente han pamatay waray ha panimalay nira an asawa ni Josefina Sumayong, matungod nga pumakadto ine ha Kananga Leyte.
Dugang pa ha nagin testimonya hiton asawa han usa nga biktima, nga mayda nawawara nga kwarta nga maabot ha P100,000.00
Ha nagin hulagway pa han mister hiton biktima nga hi Josefina, nga nag-deposit anay an mga ine in kwarta ha proper hiton Palompon, ngan nagbelin hin maabot P100K nga gagamiton unta han mga ine ha pagbabayad o pag renta ha ira tanuman hiton humay.
Ginmalatumat naman han mao opisyal, ha ira nakuha nga impormasyon tikang ha pira nga mga witness, kun diin nakit-an la hine pinaagi han paghiling ha ira bintana nga mayda duha nga naka-bonet nga indibidwal naka-longsleeves hin itom ngan sumakay an mga ine hin single motorcycle kahuman in kumalagiw na ha crime scene.
Nanawagan naman an mao nga opisyal ha pira pa nga mga witness, nga dire mahadlok ngan magruwa-duha nga makipagsumpayan ha ira buhatan, agud nga matagan hin hustisya an pagkamatay han magtala-iroy nga senior citizen.
