TACLOBAN CITY – Hustisya an panawagan han pamilya han usa nga sundalo tikang ha Eastern Samar nga usa ha mga naawatan hin kinabuhi han nahitabo nga twin bombing ha Jolo, Sulu han nakalabay nga Agosto 24, 2020.
Ha pagkayana in nakahay-ad ngan ginlalamayan na an patay nga lawas ni Pvt. John Rey Paller, han 21st Infrantry Battalion mahuman ini nga maiuli ha pamilya hini ha Brgy. Parina, Giporlos, Eastern Samar han nakalabay nga Miyerkules.
Sumala han nanay hini nga hi Zaida Paller, tubtob yana in duro la gihapon an ira kasubo ha timprano nga pagkawara han ira anak nga 23 anyos pala an pangidaron.
San-o mahitabo an insidente ha Sulu, in nakahimangraw anay nira hi John Rey san-o nga magsarit nga mayda lalakton ngan trabahuon kaupod an iya mga igkasi sundalo ha mao nga adlaw.
Han kulop han mao nga adlaw, in gintawagan nala hira han mga kaurusa ni Pvt. Paller nga sundalo para igsumat nga patay na an ira anak.
Ha pagkayana in naglalaum an pamilya Paller nga matatagan hin hustisya an naging kamatayon hini ngan mapapagbaton an hin-o man nga nagpapaluyo ha mao nga insidente.
