TACLOBAN CITY – Nadiskubrehan han 2 kaadlaw nga inquiry han Committee on Housing and Urban Development nga may- ada subcontractor ha mga Yolanda housing Projects nga gintukod ha Eastern Samar.
An pagkakamay- ada hin subcontractor an gintudlok han mga kongresista nga rason kon kay ano nadedelatar ngan mga substandard daw an mga gintukod nga pabalay.
Sumala kan Engineer Camillo Salazar, nga usa hea ha mga subcontractor nga ginkuha han JC Tayag Builders, an kontraktor naman nga gintagan hin katungod han National Housing Authority nga magtindog mga housing units ha Balangiga Eastern, Samar.
Gin- amin ni Salazar nga 40 ka mga housing units an iya nakontrata ngan an mga ini daw in gingamitan nira hin mga substandard nga mga construction materials.
Dugang pa ni Engineer Salazar nga mayda pa daw baraydan ha iya nga 300, 000 ka pesos an JC Tayag Builders pero aminado liwat ini nga waray niya kinakaptan nga dokumento nga magpapamatuod nga gin subcontract niya an mga housing projects han JC Tayag Builders.
Mababaruan nga maabot hin 7, 573 nga mga housing units an nakatalaan nga igtukod han NHA ha Eastern Samar, pero 454 pala nga mga units an ira natatapos ngan 289 han mga ini in waray naukoy , harapit upat katuig na mahuman an paglasurbo han supertyphoon Yolanda .
Naglalaum naman an publiko matatagan hin tunay nga solusyon an problema ha mga pabalay han mga Yolanda survivors ngan diri la ha public hearing ngan inquiries ini matatapos.
