Gin dayaw ni Presidente Ferdinand Marcos Jr. an mga mananarabaho nga Pilipino ngan ginkilala an importante nga papel han mga ini ha pagpa-ursa han nasud kadungan han pagselebrar han Labor Day dida han Mayo 1.
Ha mensahe han Presidente, gintagan-duon hini nga an mga mananarabaho an nagseserbi nga ‘backbone’ han republika, anuman an oras ngan klase han ira trabaho.
Ha kaluyo han pag-ursa han teknolohiya ngan pagbabag-o ha mga indiustriya, nagpapabilin nga importante an kontribusyon han kada Pilipino nga empleyado.
Iginduon pa ni Marcos nga pinaagi han kamaduruto ngan sakripisyo han mga empleyado, nagkakamay-ada hin kadig-on an mga pamilya ngan kusog an bug-os nga nasud.
Gin aghat naman han Chief Executive an gobyerno ngan pribado nga sektor nga padayon nga magbinuligay agud masigurado nga an paningkamot han mga empleyado in mayda kabalyo nga pahalipay ngan oportunidad.
Gin sigurado gihapon han Presidente nga magpapabilin nga prayoridad han iya administrasyon an paghimo hin mas damo nga trabaho, pagpapakusog ha proteksyon ha mga empleyado, ngan paghahatag hin mas haluag nga oportunidad para ha ngatanan.
