Kumpiyansa an usa nga miyembro han House justice committee nga makakakuha an mababang kapulungan hin sadang nga botos agud i-impeach hi Bise Presidente Sara Duterte.
Sumala kan panel member Bicol Saro partylist Representative Terry Ridon, nakakuha na an House justice panel hin 53 nga botos para makakita hin probable cause o sadang nga basaran agud ma-impeach an ika duha nga pinakahitaas nga opisyal han gobyerno.
Kompyansa naman hi Ridon nga diri makuri makuha an 106 nga botos agud ma impeach an bise ngan dad-on an impeachment case ha Senado.
Tikang ha kabug-usan nga miyembro nga 318, kinahanglan han Kamara hin 1/3rd o 106 nga kabug-usan nga miyembro hini nga ma aboyon agud ma-impeach hi Duterte.
Sumala pa kan Ridon, target han mao nga grupo nga makakuha hin 215 minimum number of votes nga una na nga nakuha dida han siyahan nga impeachment hearing.
Manunumduman nga dida han Pebrero tuig 2025 han ig-impeach han Mababang Kapulungan hi Duterte kun diin, nakakuha hin kabug-usan nga 215 votes, nga lumabay han gin kikinahanglan nga 1/3 threshold o 102 nga botos rason kun kay ano naipadara an Articles of Impeachment kontra ha Bise Presidente ha Senado.
Ha kaluyo hini, bumotos naman an Senado dida han Agosto 2025 nga ig padara an kaso han impeachment ha archives, mahuman an desisyon han Korte Suprema nga igindeklara nga “unconstitutional” an Articles of Impeachment mahitungod han pagtalapas hini ha one-year bar rule ngan mga katungdanan han due process.
Samtang, naghaon naman hin pitad an panel han Kamara nga pag urusahon an duha nga beripikado nga reklamo ha ilarom han usa nga Articles of Impeachment sugad man magpapagawas gihapon ini hin committee report nga ighahatag kan VP Duterte, ha mga nagreklamo, ngan mga miyembro han komite.
Nakatalaan naman nga magpapadayon an hearing yana nga alas 10 hiton aga, Mayo 4, 2026.
