Igin mando ni Pangulong Ferdinand Marcos Jr. ha mga ahensya han gobyerno nga dayon tagan hin bulig an mga komunidad nga naapektuhan han ashfall tikang ha Mayon Volcano, partikular na ha mga bungto han Guinobatan ngan Camalig ha probinsya han Albay.
Sumala ha Presidential Communications Office (PCO), mahugot an gin hihimo nga response operations han gobyerno agud ma proteharan an kalawasan han publiko, masiguro an katalwasan han mga residente, sugad man maipabilin nga abre an mga kalsada ngan importante nga mga serbisyo ha mga apektado nga lugar.
Nanguna an Department of Public Works and Highways (DPWH) ha clearing operations agud tanggalon an madakmol nga abo ha mga pangunahon nga kalsada sugad man masiguro an talwas nga pagbiyahe han mga residente ngan emergency responders.
Samtang, naghatag naman hin bulig an Department of Social Welfare and Development (DSWD) ha mga pamilya nga aadto ha evacuation centers. Kaupod na dinhi an yinukot-yukot nga family food packs, ready-to-eat meals, ngan iba pa nga mga relief supplies nga naka-preposition ha bug-os nga Bicol Region.
Nagpadangat ug naghatag na gihapon an DSWD Field Office 5 hin ready-to-eat food boxes ngan sleeping mats, samtang igin aandam naman an mobile kitchen agud makapagluto hin mapaso nga pagkaon kun mag iha an pag ukoy han mga evacuees ha evacuation sites.
Sumala ha DSWD, umabot na ha P39.6 milyon an naipanhatag nga ayuda, kaupod na an P11.3 milyon para ha Emergency Cash Transfer ngan P28.3 milyon ha ilarom han Cash-for-Work program nga natagamtaman han subra 2,000 nga mag uruma nga naapektuhan han aktibidad han bulkan.
Ha pinakaurhi nga datos, subra 300,000 nga family food packs ngan subra 7,000 ready-to-eat food boxes na an naipanhatag ha mga apektado nga residente ha rehiyon.
Samtang, nag-deploy na gihapon an Department of Health (DOH) hin N95 masks, mobile clinics, ngan water stations agud mabuligan an mga problema pan lawas han mga residente sugad han ubo, kinukurian paghinga, ngan iritasyon ha mata durot han ashfall.
Ha bulig naman han Department of the Interior and Local Government (DILG), igin pakalat an Bureau of Fire Protection (BFP) para ha water spraying ngan paglilimpyo han abo ha mga komunidad.
Gin pangunahan naman han Office of Civil Defense (OCD) ngan National Disaster Risk Reduction and Management Council (NDRRMC) an mahugot nga pagpapatuman han evacuation ngan padayon nga monitoring ha mga high-risk area.
Igin mando gihapon han Presidente an mahugot nga pagbabantay ha mga salog ngan kuruhaan hin tubig mahitungod han hulga hin lahar, ilabi na kun maka-eksperyensya hin makusog nga pag-uran.
Samtang, gin pahinumdoman naman an mga residente nga magpabilin nga alerto, diri mag ginawas-gawas ha mga panimalay, magsul-ot hin protective mask, ngan sundon an mga abiso han lokal nga panggobyernohan.
