TACLOBAN CITY – Dire daw sadang nga igbasul kan Presidente Rodrigo Duterte an pagdamo han ihap han mga abogado nga napatay ha ilarom han presente nga administrasyon.
Ini in mahuman nga igbuyagyag han Integrated Bar of the Philippines (IBP) nga umabot na ha 38 nga mga abogado an napatay tikang han paglingkod ha pwesto ni Presidente Duterte.
Sumala naman kan Atty. Leo Giron, Presidente han IBP Leyte Chapter, mas nababarkaa hiya nga samtang ginpapahugot an kampanya ala kontra ha ilegal nga droga in napapasagdan naman an peace and order han nasud mahitungod han mga tawo nga waray ginpipili pagpatay pati na an mga nabibiktima nga mga abogado.
Damo nga abogado na gihapon an diri nakarawat hin mga kaso nga may kalabutan ha ilegal nga droga mahitungod ha kahadlok han hulga ha ira kinabuhi.
Samtang, ginkalipay naman han mao nga opisyal nga ha iya serbisyo in waray nahipatik nga insidente hin pagpatay hin mga abogado ha Eastern Visayas.
Una hini, in nagbub-os an IBP hin taskforce nga mag-iimbestigar han tanan han mga kaso hin pagpatay hin mga abogado ha nasud.
Mahibabaruan nga pinakaurhi nga biktima hin pamatay hi Atty. Rex Jasper Lopoz nga ginpusil ha Tagum City, Davao del Norte.
