TACLOBAN CITY – Personal nga nagpaabot hin mensahe ha Bombo Radyo Tacloban an nagpakilala nga tag-iya han usa nga Food Products Company hiunong han pagkakalakip han ira mga produkto ha gindumara nga mining exhibit 2024 ha usa nga mall ha Marasbaras, Tacloban City.
Sumala han Island’s Best Foods, nga waray daw katugutan tikang ha ira an mao nga pagkakalakip han ira produkto ha mao nga exhibit.
Ginklaro pa hini nga waray hira koneksyon ha Emir Mineral Resources Corporation o bisan ano man daw nga mining company.
Pagduon pa nira nga waray bisan ano nga bulig o suporta an ira nakarawat ha bisan ano man nga mining company kundi tungod han mga hardworking ngan mga Calamansi Farmers ha Homonhon Island, nga naaapektuhan naman han pagmimina.
Ira gin aaghat an mao nga korporasyon nga tanggalon ngan diri ig upod an ira mga produkto ha pag eexhibit kundi magbubuhat daw hira hin legal action.
Gin aaruan pa naman natun hin pamahayag an Mines and Geosciences Bureau Region 8 ngan sugad man gihapon an Emir Mineral Resources Corporation.
