Nakatalaan nga kumarat hin panibag-o nga pagkilala an boxing legend ngan People’s Champ Manny Pacquiao mahuman nga ig-anunsyo nga hiya in magigin kaparte han Class of 2027 han U.S. National Boxing Hall of Fame.
Ginbuhat an anunsyo ha 3rd Pacquiao-Elorde Awards Night nga gindumara ha Manila, kun diin ginkumpirma ni Eric Schmidt an nasabi nga pagkilala.
Ugsa ini, nahilakip na gihapon hi Pacquiao ha International Boxing Hall of Fame Class of 2025 ha Canastota, New York. Dinhi in nakaupod niya an igkasi Pilipino boxing greats nga hira Gabriel Elorde ngan Pancho Villa.
Kilala hi Pacquiao kumo nag-uusaan nga eight-division world champion ha kasaysayan han boxing, kun diin mayda hiya 12 major world titles ngan nakatumparak an 22 world champions ha kabug-usan han iya karera.
Ha surat tikang ha National Boxing Hall of Fame, gintudlok hi Pacquiao kumo “Main Event” inductee para ha Class of 2027.
Ginlalauman naman nga maatender hi Pacquiao ha induction ceremony nga pagbubuhaton ha Abril 25, 2027, ha Quiet Cannon ha Montebello, California.
